JEE Main 2026 | జేఈఈ మెయిన్ 2026 రాస్తున్నారా? NTA కీలక సూచనలివే..!
జేఈఈ మెయిన్(JEE -Main 2026) తొలి విడత పరీక్షకు సర్వం సిద్ధమైంది. దేశవ్యాప్తంగా లక్షలాది మంది విద్యార్థులు రాసే ఈ పరీక్షలు బుధవారం నుంచే ప్రారంభం కానున్నాయి.
By Education News Team
Updated :16 Jan 2026 19:41 IST
https://results.eenadu.net/news.aspx?newsid=Important-guidelines-for-JEE-Main-2026-Students
ఇంటర్నెట్ డెస్క్: జేఈఈ మెయిన్(JEE -Main 2026) తొలి విడత పరీక్షకు లక్షలాది మంది విద్యార్థులు సిద్ధమవుతున్నారు. దేశవ్యాప్తంగా బుధవారం (జనవరి 21) నుంచి ఈ పరీక్షలు ప్రారంభం కానున్నాయి. ఈ పరీక్షను విజయవంతంగా నిర్వహించేందుకు ఎన్టీఏ(NTA) అధికారులు రంగం సిద్ధం చేస్తున్నారు. ఇందులో భాగంగా నేడో, రేపో అడ్మిట్ కార్డులను విడుదల చేయనున్నారు. జనవరి 21 నుంచి 30 వరకు జరిగే JEE Main 2026 పరీక్షలకు సన్నద్ధమవుతున్న విద్యార్థులకు ఎన్టీఏ చేసిన కీలక సూచనలివిగో..
ఇవి మరిచిపోవద్దు..
- పరీక్ష కేంద్రానికి వెళ్లేటప్పుడు కచ్చితంగా అడ్మిట్ కార్డుని వెంట తీసుకెళ్లండి. అలాగే, NTA వెబ్సైట్ నుంచి డౌన్లోడ్ చేసిన సెల్ఫ్ డిక్లరేషన్ ఫారంను కచ్చితంగా నింపాలి. అడ్మిట్ కార్డు లేకపోతే పరీక్ష కేంద్రంలోకి అనుమతించరు.
- ఫొటో ఐడీ: విద్యార్థులు తమ ధ్రువీకరణను నిర్ధారించేలా ఫొటోతో కూడిన ఏదైనా గుర్తింపు కార్డులను తీసుకెళ్లాలి పాన్ కార్డు, డ్రైవింగ్ లైసెన్స్, పాస్పోర్టు, ఆధార్ కార్డు, రేషన్కార్డు లేదా 12వ తరగతి అడ్మిట్ కార్డు, అభ్యర్థి ఫొటో ఉన్న బ్యాంకు పాస్ పుస్తకం.. వీటిలో ఏదైనా ఒక గుర్తింపు కార్డును పరీక్ష కేంద్రం వద్దకు తీసుకెళ్లడం తప్పనిసరి.
- పరీక్ష కేంద్రానికి పాస్పోర్టు సైజ్ ఫొటోను తీసుకెళ్లడం మరిచిపోవద్దు. మీరు ఆన్లైన్ దరఖాస్తు చేసినప్పుడు అప్లోడ్ చేసిన ఫొటోనే ఎగ్జామ్ సెంటర్కు తీసుకెళ్లాలి. ఎందుకంటే దాన్ని అటెండెన్స్ షీట్పై అతికించాల్సి ఉంటుంది.
- విద్యార్థులు ట్రాన్స్పరెంట్గా ఉండే బాల్పాయింట్ పెన్ను తీసుకెళ్లాలి.
- పీడబ్ల్యూడీ సర్టిఫికెట్: దివ్యాంగులైన విద్యార్థులు ఎవరైనా ఉంటే వారు తమ వెంట మెడికల్ ఆఫీసర్ ధ్రువీకరించిన సర్టిఫికెట్ను తీసుకెళ్లడం తప్పనిసరి.
మరికొన్ని కొన్ని కీలక సూచనలివిగో!
- మీ అడ్మిట్ కార్డులో ఇచ్చిన సూచనల్ని క్షుణ్ణంగా చదవండి. పరీక్ష సమయానికి రెండు గంటలు ముందుగానే చేరుకొనేలా ప్లాన్ చేసుకోండి. అడ్మిట్ కార్డులో పేర్కొన్న సమయానికి మీకు కేటాయించిన పరీక్షా కేంద్రం వద్ద రిపోర్టు చేయండి. పరీక్ష హాలు తెరవగానే మీకు కేటాయించిన సీట్లో కూర్చొని పరీక్ష రాసేందుకు అవసరమైనవన్నీ ఉన్నాయో, లేదో సరిచూసుకోండి.
- ట్రాఫిక్ జామ్, రైలు/బస్సు ఆలస్యం వంటి కారణాలతో పరీక్ష కేంద్రానికి ముందుగా చేరుకోకపోతే.. అక్కడ ఇన్విజిలేటర్లు ఇచ్చే ముఖ్యమైన సూచనల్ని మీరు మిస్ అయ్యే అవకాశం ఉంటుంది.
- అభ్యర్థుల ఆలస్యానికి ఎన్టీఏ ఎలాంటి బాధ్యత వహించదు.
- పరీక్ష హాలులో ఏదైనా సాంకేతిక సాయం/ఎమర్జెన్సీ, పరీక్షకు సంబంధించి ఇబ్బంది ఎదురైతే సెంటర్ సూపరింటెండెంట్ /ఇన్విజిలేటర్ను సంప్రదించవచ్చు.
- మీరు ఎంపిక చేసుకున్న సబ్జెక్టు ప్రకారం కంప్యూటర్లో ప్రశ్నపత్రం వచ్చిందో లేదో సరిగా నిర్ధారించుకోండి. వేరే సబ్జెక్టుకు సంబంధించిన ప్రశ్నపత్రం వస్తే వెంటనే సంబంధిత ఇన్విజిలేటర్ దృష్టికి తీసుకెళ్లండి.
- ఎవరైనా అభ్యర్థులు తప్పుడు సమాచారం ఇచ్చి ఒకటి కంటే ఎక్కువ షిఫ్టులు/తేదీల్లో పరీక్ష రాస్తే.. వారిపై కఠిన చర్యలు ఉంటాయి. వారి అభ్యర్థిత్వాన్ని రద్దు చేయడమో నిబంధనల ప్రకారం మూడేళ్ల వరకు పరీక్షలు రాయకుండా నిషేధం విధించడం వంటి చర్యలు తీసుకొనే అవకాశం ఉంటుంది.
- పరీక్ష కేంద్రంలో ఇచ్చే రఫ్ షీట్లపైనే కాలిక్యులేషన్సు/రైటింగ్ వర్కు చేయాల్సి ఉంటుంది. ఆ తర్వాత రఫ్ షీట్లను కచ్చితంగా ఇన్విజిలేటర్కు అందజేయాలి.
- ఏ కారణం వల్లనైనా షెడ్యూల్ చేసిన పరీక్ష తేదీకి హాజరు కాలేని వారికి ఎట్టి పరిస్థితుల్లోనూ ఎన్టీఏ తిరిగి పరీక్ష నిర్వహించదు.
- అభ్యర్థులు జేఈఈ మెయిన్ 2026 కన్ఫర్మేషన్ పేజీ, అడ్మిట్ కార్డ్, స్కోర్ కార్డుల హార్డ్, సాఫ్ట్కాపీలను భద్ర పరుచుకోవాలి. ఎందుకంటే జులై 31 తర్వాత అవి వెబ్సైట్లో అందుబాటులో ఉండవు.
వీటికి నో ఎంట్రీ..
- చిరుతిళ్ళు, జామెట్రీ/పెన్సిల్ బాక్స్, హ్యాండ్ బ్యాగ్, పర్సు, పేపర్లు/స్టేషనరీ, ప్రింటెడ్ మెటీరియల్, వాటర్ బాటిళ్లు, మొబైల్ఫోన్/ఇయర్ ఫోన్/మైక్రోఫోన్/పేజర్, కాలిక్యులేటర్, డాక్యుపెన్, కెమెరా, టేప్ రికార్డర్ వంటి ఎలాంటి ఎలక్ట్రానిక్ వస్తువులు/గ్యాడ్జెట్లు/పరికరాలను పరీక్ష కేంద్రంలోకి అనుమతించరు. ఎక్కువ పాకెట్స్ ఉన్న దుస్తులు వేసుకోవద్దు. వీటితో పాటు నగలు, మెటాలిక్ వస్తువులు పరీక్ష కేంద్రంలోకి నిషేధం.
- కంప్యూటర్ ఆధారిత పరీక్షకు సంబంధించి ఏవైనా ప్రశ్నలు/సందేహాలను నివృత్తి చేసుకొనేందుకు జేఈఈ(మెయిన్) వెబ్సైట్లో హెల్ప్లైన్ నంబర్ 011-40759000 నంబర్కు లేదా jeemain@nta.ac.in ద్వారా సంప్రదించవచ్చు.