Job Market Trends | జాబ్‌ మార్కెట్‌ ట్రెండ్స్‌: 2030 నాటికి ఏ ఉద్యోగాలు పెరుగుతాయ్‌? ఏవి తగ్గుతాయ్‌?
ప్రపంచ ఆర్థిక వేదిక (WEF) ఫ్యూచర్‌ ఆఫ్‌ జాబ్స్‌ రిపోర్టు - 2025 అంచనాల ప్రకారం.. 2030 నాటికి 92 మిలియన్ల ఉద్యోగాలు కనుమరుగయ్యే అవకాశం ఉంది. కానీ, అదే సమయంలో కొత్తగా 170 మిలియన్ల ఉద్యోగావకాశాలు రాబోతున్నాయని అంచనా.
By Education News Team
Published :02 Feb 2024 15:27 IST
https://results.eenadu.net/news.aspx?newsid=02022025
Fastest Growing Jobs| మారుతున్న కాలానికనుగుణంగా జాబ్‌ మార్కెట్లో కొత్త ట్రెండ్స్‌ వస్తుంటాయి. ఐటీ రంగంలో వస్తోన్న విప్లవాత్మక మార్పులతో అనేక ఉద్యోగాలు మాయమైపోతుంటే.. అంతకు మించి కొత్త ఉద్యోగ అవకాశాలు వస్తున్నాయి. ఈ క్రమంలో మార్కెట్‌ అవసరాలకు తగిన కొత్త నైపుణ్యాలు ఉన్నవారికే విపరీతమైన డిమాండ్‌ ఉంటుంది. ప్రపంచ ఆర్థిక వేదిక (WEF) ఇటీవల వెలువరించిన ఫ్యూచర్‌ ఆఫ్‌ జాబ్స్‌ రిపోర్టు - 2025 అంచనాల ప్రకారం.. 2030 నాటికి 92 మిలియన్ల ఉద్యోగాలు కనుమరుగయ్యే అవకాశం ఉంది. కానీ, అదే సమయంలో కొత్తగా 170 మిలియన్ల ఉద్యోగావకాశాలు రాబోతున్నాయని అంచనా వేసింది. ఈ క్రమంలో ఏ రంగాల్లో ఉద్యోగాలు ఎక్కువగా ఉండబోతున్నాయి? వేటిలో తగ్గుతాయనే అంచనాల్ని ఓసారి పరిశీలిస్తే.. (Job Market Trends By 2030)
- ప్రస్తుతం ఉన్నవాటి కంటే 2030 నాటికి 78 మిలియన్ల ఉద్యోగాలు ప్రపంచవ్యాప్తంగా కొత్తగా వస్తున్నాయి. ఇదే సమయంలో ఇప్పటికే ఉన్న కొలువుల్లో అంతగా సృజనాత్మకత అవసరం లేనివి ఆటోమేషన్‌ కారణంగా కనుమరుగు కాబోతున్నాయి. అందువల్ల ఇటువంటి జాబ్స్‌లో ఉన్న వారు అదనపు నైపుణ్యాలు నేర్చుకోవడం ద్వారా సులభంగా కెరియర్‌ మార్పు చేసుకునేందుకు కుదురుతుందని నిపుణులు సూచిస్తున్నారు.
- ఏఐ, రోబోటిక్స్‌ వంటి నైపుణ్యాలు ఉన్న ఉద్యోగార్థులు ఇప్పటికే ముందంజలో ఉన్నట్టు పేర్కొంది. కేవలం 2024లోనే ‘జెనరేటివ్‌ ఏఐ’ కోర్సులో వివిధ ఆన్‌లైన్‌ లెర్నింగ్‌ ప్లాట్‌ఫామ్స్‌ ద్వారా లక్షల మంది విద్యార్థులు నమోదు చేసుకున్నారు. తగిన శిక్షణ పొంది కెరియర్‌లో ముందుకెళ్లేందుకు ప్రయత్నిస్తున్నారు.
- ఆర్టిఫిషియల్‌ ఇంటెలిజెన్స్‌ (ఏఐ) కెరియర్లు మరింతగా ఊపందుకోనున్నాయి. క్లరికల్‌ వర్క్స్‌ వంటివి తగ్గుముఖం పడుతూండగా.. టెక్‌ సంబంధిత ఉద్యోగాలు మరింతగా పెరగనున్నాయి. భవిష్యత్తులో ఉద్యోగాల సంఖ్య మాత్రమే కాకుండా.. పనిచేసే తీరులోనూ మార్పు రానుంది. ఈ నివేదిక ప్రకారం ఉద్యోగాల సంఖ్య వేగంగా అభివృద్ధి చెందబోతోంది.
- స్కిల్‌ గ్యాప్‌: ఈ నివేదికలో మరో ముఖ్యమైన అంశం నైపుణ్యాల మధ్య అంతరం (స్కిల్‌ గ్యాప్‌). ఇప్పుడు అవసరం అవుతున్న స్కిల్స్‌లో దాదాపు 40 శాతం 2030 నాటికి కనుమరుగవుతాయి. కొత్తవి నేర్చుకోకపోతే ఆ ఉద్యోగులు మార్కెట్లో నిలదొక్కుకోవడం కష్టమే.
- ఇప్పుడున్న వారిలో దాదాపు 63 శాతం మందికి ఇటువంటి అడ్డంకి ఎదురయ్యే ప్రమాదం ఉంది. ఇలా జరగకుండా వర్క్‌ ఫోర్స్‌ను మార్పునకు సంసిద్ధం చేయడంలో ఆన్‌లైన్‌ లెర్నింగ్‌ వేదికలు ముఖ్యపాత్ర పోషిస్తున్నాయి. వీటిని ఉపయోగించుకోవడం ద్వారా స్కిల్‌ గ్యాప్‌ బారిన పడకుండా జాగ్రత్తపడొచ్చు.
భారీగా పెరిగే కెరియర్లలో ముందున్నవి ఇవే..
బిగ్‌ డేటా స్పెషలిస్ట్: గంపగుత్తగా ఉన్న డేటా నుంచి కావాల్సిన కచ్చితమైన సమాచారాన్ని సేకరించడం, ట్రెండ్స్‌ను అంచనా వేయడం, సంస్థ మరిన్ని సమర్థ నిర్ణయాలు తీసుకునేలా చేయడంలో వీరు ముఖ్యపాత్ర పోషిస్తారు. ఈ ప్రొఫెషనల్స్‌ డేటా మైనింగ్, రిసెర్చ్, డేటా అనాలిసిస్ వంటి వాటిలో నిష్ణాతులు. ఇందులో డేటా అనలిస్ట్, బిజినెస్‌ అనలిస్ట్, డేటా అండ్‌ అనలిటిక్స్‌ మేనేజర్, బిజినెస్‌ ఇంటెలిజెన్స్‌ అనలిస్ట్.. ఇలా పలు రకాల పోస్టులున్నాయి. కంప్యూటర్‌ సైన్స్, స్టాటిస్టిక్స్, బిజినెస్‌ డేటా అనలిటిక్స్‌ వంటి సబ్జెక్టుల్లో ప్రావీణ్యం ఉన్నవారు ఈ కెరియర్‌లో రాణించగలరు. ప్రోగ్రామింగ్‌ లాంగ్వేజ్, డేటాబేసెస్, ఎస్‌క్యూఎల్‌.. వంటి అంశాలపై అవగాహన ఉంటే సులభంగా ప్రవేశించవచ్చు.
ఫిన్‌ టెక్‌ ఇంజినీర్: ఫైనాన్స్, టెక్నాలజీ, ఇన్నోవేషన్‌ను కలిపితే వచ్చేవే ఫిన్‌టెక్‌ కెరియర్లు. దీనిలో రాణించేవారే ఆ ఇంజినీర్లు. ఈ సెక్టార్‌లో ఫైనాన్షియల్‌ అనలిస్ట్, డేటా అనలిస్ట్, డేటా సైంటిస్ట్, ప్రొడక్ట్‌ మేనేజర్, బిజినెస్‌ డెవలప్‌మెంట్‌ మేనేజర్ వంటి పలు ఉద్యోగాలున్నాయి. ఇందులో చేరాలనుకునే విద్యార్థులకు ఆర్థిక అంశాలపై అవగాహన ఉండటంతోపాటు టెక్నికల్, సాఫ్ట్‌ నైపుణ్యాలు ఉండాలి. తద్వారా ఫైనాన్షియల్‌ అనలిస్ట్, డేటా అనలిస్ట్, డేటా సైంటిస్ట్, ప్రొడక్ట్‌ మేనేజర్, బిజినెస్‌ డెవలప్‌మెంట్‌ మేనేజర్.. ఇలా అనేక పాత్రల్లో ఒదిగిపోవచ్చు. ఇందులో కెరియర్‌ ప్లాన్‌ చేసుకోవాలి అనుకుంటే టెక్నికల్ నైపుణ్యాలు, డేటా అనాలిసిస్, సమస్యా పరిష్కారం, ప్రాజెక్ట్‌ మేనేజ్మెంట్, సైబర్‌ సెక్యూరిటీ మీద కనీస అవగాహన ఉండాలి.
ఏఐ అండ్‌ మెషిన్‌ లెర్నింగ్‌ స్పెషలిస్ట్: ప్రపంచమంతా కొత్త టెక్నాలజీ వైపు అడుగులు వేస్తోంది. ఏఐ ఈ శతాబ్దపు అత్యంత ఆవశ్యకమైన ఆవిష్కరణలను చేయగలదు. ఇప్పటికే సెల్ఫ్‌ డ్రైవింగ్‌ కార్లు, రోబోట్లు వంటివి ఈ కోవలో ఉన్నాయి. అందుకే ఏఐ, ఎంఎల్‌ ఎన్నో విధాలైన కెరియర్లకు మూలం కాబోతున్నాయని నమ్ముతున్నారు. దీనివల్ల డేటా సైంటిస్ట్, మెషిన్‌ లెర్నింగ్‌ ఇంజినీర్, రిసెర్చ్ సైంటిస్ట్, బిజినెస్‌ ఇంటెలిజెన్స్‌ డెవలపర్, ఏఐ డేటా అనలిస్ట్, బిగ్‌ డేటా ఇంజినీరింగ్, రోబోటిక్స్‌ సైంటిస్ట్, ఏఐ ఇంజినీర్.. తదితర విధాలుగా ఎక్కువ ఉద్యోగాలుంటాయి.
సాఫ్ట్‌వేర్‌ అండ్‌ అప్లికేషన్‌ డెవలపర్స్‌: వీరు కంప్యూటర్‌ అప్లికేషన్స్‌ను డిజైన్ చేస్తారు. వినియోగదారులు ఉపయోగించే అన్నివిధాలైన అప్లికేషన్లు, గేమ్స్, సాఫ్ట్‌వేర్లు.. సంస్థలకు డేటాబేస్‌లు వంటివి తయారుచేస్తారు. దీనికి సాధారణంగా బ్యాచిలర్‌ డిగ్రీతోపాటు ఉద్యోగానికి తగిన విధంగా అర్హతలు ఉండాలి. టెక్నాలజీలో ఎప్పటికప్పుడు వచ్చే మార్పులను అందిపుచ్చుకోవాలి. కంప్యూటర్‌ సైన్స్, సాఫ్ట్‌వేర్‌ ఇంజినీరింగ్, సంబంధిత అంశాలు చదువుకుని ఉండాలి.
సెక్యూరిటీ మేనేజ్మెంట్ స్పెషలిస్ట్: ఒక సంస్థ సైబర్‌ రక్షణ విషయంలో డిజైన్, దాని అమలు, నిర్వహణ.. ఇలా మొత్తం చూసేవారే సెక్యూరిటీ మేనేజ్మెంట్ స్పెషలిస్ట్. ఏవైనా రక్షణ లోపాలు ఉన్నా, సమస్యలు తలెత్తే అవకాశాలు ఉన్నా ముందుగా మేలుకుని తగిన చర్యలు తీసుకుంటారు. సెక్యూరిటీ ఆడిట్, రిస్క్‌ అనాలిసిస్, సిస్టమ్‌ ఇన్‌స్పెక్షన్‌.. ఇలాంటి మొత్తం అంశాలకు వీరే బాధ్యత వహిస్తారు. బ్యాచిలర్‌ డిగ్రీతోపాటుగా కంప్యూటర్‌ అండ్‌ ఎలక్ట్రానిక్స్, కస్టమర్‌ సర్వీస్, అడ్మినిస్ట్రేషన్‌ - మేనేజ్మెంట్.. ఇలాంటి పలు అంశాలపై అవగాహన ఉండాలి.
- ఇంకా డేటా వేర్‌హౌసింగ్‌ స్పెషలిస్ట్, అటానమస్‌ అండ్‌ ఎలక్ట్రిక్‌ వెహికల్‌ స్పెషలిస్ట్, యూఐ అండ్‌ యూఎక్స్‌ డిజైనర్స్, ఐవోటీ స్పెషలిస్ట్, రెన్యూవబుల్‌ ఎనర్జీ ఇంజినీర్.. ఇలా పలు ఉద్యోగాలు ఈ జాబితాలో పేర్కొన్నారు.