Job Skills | 2026లో జాబ్ రావాలంటే.. ఈ నైపుణ్యాలు మీలో ఉన్నాయా?
టెక్నాలజీ రంగంలో వస్తోన్న విప్లవాత్మక మార్పులతో ఉద్యోగం ఇచ్చేందుకు కంపెనీలు కేవలం చదువు, సాంకేతిక నైపుణ్యాలే కాదు.. అభ్యర్థులను పరీక్షించేటప్పుడు ఇంకొన్ని స్వాభావికమైన లక్షణాల్నీ చూస్తున్నాయి. అవేంటంటే?
By Education News Team
Updated :31 Dec 2025 15:13 IST
https://results.eenadu.net/news.aspx?newsid=31122025jobs2026
ఇంటర్నెట్ డెస్క్: ప్రస్తుత పోటీ ప్రపంచంలో పరిశ్రమల అవసరాలు ఎప్పటికప్పుడు మారిపోతున్నాయి. ఈ పరిస్థితుల్లో ఉద్యోగం సాధించాలంటే కేవలం విద్యార్హతలుంటే సరిపోదు.. తగిన సాంకేతిక నైపుణ్యాలూ (Technical Skills) అవసరమే. వీటికితోడు కొన్ని స్వాభావికపరమైన నైపుణ్యాలు కలిగిన అభ్యర్థుల పట్ల రిక్రూటర్లు అమితమైన ఆసక్తి కనబరుస్తున్నాయి. నూతన సంవత్సరంలో కంపెనీలు రెడ్ కార్పెట్ వేసి ఆహ్వానించేలా మీలో ఈ నైపుణ్యాలు (Job Skills) ఉన్నాయో, లేదో ఓసారి చెక్ చేసుకోండి. లేదంటే ఇకనుంచైనా ఈ స్వాభావికమైన స్కిల్స్ అలవర్చుకొనేందుకు ప్రయత్నిస్తే మేలు.
కొత్తవి నేర్చుకుంటున్నారా?
ఉన్నత చదువులు పూర్తికాగానే జాబ్ వచ్చేస్తుందనుకొనే రోజులకు కాలం చెల్లింది. మార్కెట్ అవసరాలకు తగ్గ నైపుణ్యాల్లేకపోతే ఏళ్ల పాటు చెప్పులు అరిగేలా తిరిగినా ఫలితం ఉండదు. మారుతున్న టెక్నాలజీని అందిపుచ్చుకుంటేనే నిలదొక్కుకోగలం. అందుకు నిత్య విద్యార్థిగా ఉండాల్సిందే. కొత్త విషయాలను నేర్చుకుంటూనే ఎప్పటికప్పుడు అప్డేట్ అయితేనే కెరీర్లో ఉన్నత స్థాయికి ఎదిగే అవకాశాలుంటాయి. ప్రస్తుతం అన్నిరంగాల్లోనూ విస్తరిస్తున్న ఏఐ టెక్నాలజీ, డేటా అనలిటిక్స్ వంటి కొలువులకు డిమాండ్ పెరుగుతోంది. ఈ నేపథ్యంలో ఎప్పటికప్పుడు సమస్యలు పరిష్కరించే, డేటా విశ్లేషణ నైపుణ్యాలున్నవారి వైపే రిక్రూటర్లు మొగ్గుచూపుతున్నారు.
కొత్తదనాన్ని స్వాగతిస్తారా?
ప్రపంచంలో వస్తోన్న పోకడలకనుగుణంగా కొత్త విషయాలు నేర్చుకోవాలన్న ఉత్సుకత ఉండాలి. నిత్యనూతనంగా ఉంటూ, కొత్తగా ఆలోచించే నైపుణ్యాలున్నవారికే కంపెనీలు ఉద్యోగాల్లో పెద్దపీట వేస్తున్నాయి. అలాంటి మానవ వనరులకు ఎప్పుడైనా గిరాకీ ఉంటుంది. అందుకే ఇంటర్వ్యూ సమయంలో మీలో ఉన్న ఈ నైపుణ్యాల్ని ఉదాహరణలతో చెప్పేలా వ్యవహరించండి.
ఎదగాలనే కోరిక ఉందా?
కెరీర్లో ఉన్నతస్థాయికి ఎదగాలనే కోరిక ఉంటే సరిపోదు.. అందుకు కసి, నిరంతర పరిశ్రమ తోడైతేనే సాధ్యం. చిన్న చిన్న లక్ష్యాలను పెట్టుకొని అధిగమించే తత్వాన్ని అలవర్చుకోండి. జీవితంలో ఎదగాలనే కోరికతో పాటు పట్టుదల, ఓపిక, పోటీతత్వం, కొత్త అవకాశాలను అందిపుచ్చుకొనే గుణాన్ని పెంపొందించుకోవాలి.
మరో కోణంలో ఆలోచిస్తారా?
ఏ విషయాన్నైనా సరే.. విభిన్నంగా, క్రిటికల్గా ఆలోచించాలి. తాను పట్టుకున్న కుందేలుకు మూడే కాళ్లన్నట్టుగా వ్యవహరిస్తే కెరీర్లో రాణించలేరు. ఏదైనా ఒక సమస్య ఎదురైనప్పుడు కేవలం మీ దృష్టితోనే కాకుండా అవతలి వారి దృష్టితోనూ ఆలోచించే గుణాన్ని అలవర్చుకోవాలి. అప్పుడే, సమస్య పరిష్కారం దిశగా ఆలోచించే సామర్థ్యం మీకు అలవడుతుంది.
టీమ్ను నడిపించగలరా?
లైఫ్లో విజయం సాధించాలని అందరూ అనుకుంటారు. కానీ, అనుకున్న కలల్ని కొందరు మాత్రమే నిజం చేసుకోగలుగుతారు. మీ అభిప్రాయాన్ని ఎవరైనా తిరస్కరిస్తే వారిపట్ల కోపం/పగతో రగిలిపోతే మీరు ఏనాటికీ ఎదగలేరు. మీ అభిప్రాయంతో ఏకీభవించని వారిపట్ల కోపం/ప్రతీకారేచ్ఛతో ఉంటే టీమ్ను ముందుకు నడిపించలేరు. నలుగురితో కలుపుగోలుగా వ్యవహరించే ధోరణిని పెంపొందించుకుంటేనే టీమ్ లీడర్గానూ రాణించగలరు.