Work - Life Balance| వర్క్-లైఫ్ బ్యాలెన్స్.. 8+8+8 రూల్తో ఆరోగ్యం, ఆనందం!
ప్రతిఒక్కరికీ రోజులో ఉండేది 24గంటలే.. కాలం విలువ తెలుసుకొని దాన్ని వాడుకొనే సమర్థతలోనే ఉంటుంది అసలైన విజయ రహస్యం.
By Education News Team
Published :08 Dec 2025 3.44 PM IST
https://results.eenadu.net/news.aspx?newsid=Work-Life-Balance
ఇంటర్నెట్ డెస్క్: ప్రతిఒక్కరికీ రోజులో ఉండేది 24గంటలే.. కాలం విలువ తెలుసుకొని దాన్ని వాడుకొనే సమర్థతలోనే దాగి ఉంటుంది అసలైన విజయ రహస్యం. మనిషి జీవన శైలిలో రోజురోజుకీ చోటుచేసుకుంటున్న మార్పుల వేళ కళ్లుమూసి తెరిచే లోపే గడియారం గిర్రున తిరిగి రోజులు గంటల్లా కరిగిపోతున్నాయి. గడిచిన క్షణం తిరిగి రాదు గనక ఉన్న కొద్ది సమయాన్నే సమర్థంగా ఉపయోగించుకోవాలంటే చక్కని టైం మేనేజ్మెంట్ తప్పనిసరి. వర్క్ కల్చర్(work culture)లో మార్పులు, ఉరుకుల పరుగులతో కూడిన జీవన ప్రయాణంలో అటు వృత్తి జీవితాన్ని, ఇటు వ్యక్తిగత జీవితాన్ని సమతుల్యం (Work-Life Balance) చేసుకొని ముందుకెళ్లడం ప్రతిఒక్కరికీ కత్తిమీద సామే! ఈ నేపథ్యంలో ఒత్తిడిని జయించి శారీరక, మానసిక ఆరోగ్యాన్ని కాపాడుకొనేందుకు, ఆనందమయ జీవితానికి 8+8+8 రూల్ పాటిస్తే మేలంటున్నారు నిపుణులు.
ఇంతకీ ఏమిటీ 8+8+8 రూల్?
సమయాన్ని ఎంత సమర్థంగా ఉపయోగించుకోవచ్చో తెలిపే మంచి టైం మేనేజ్మెంట్ పద్ధతి(Time Management Method) ఇది. వృత్తి, వ్యక్తిగతమైన జీవితాలను సమతుల్యం చేసుకొనేందుకు ఇదో ఆయుధం లాంటిది. దీని ప్రకారం.. ఒక రోజులో ఉండే 24 గంటల సమయాన్ని ఎనిమిది గంటల చొప్పున విభజించుకోవాలి. 8 గంటల్ని మీ ఉద్యోగం/వృత్తికి వినియోగిస్తే.. మరో 8 గంటలను నాణ్యమైన నిద్ర కోసం కేటాయించుకోండి. తద్వారా శారీరక, మానసిక ఆరోగ్యంతో పాటు మీ లక్ష్యాలను సులువుగా చేరుకొనేందుకు ఇదో గొప్ప సాధనంగా ఉపయోగపడుతుంది. అలాగే, మిగతా 8గంటల సమయాన్ని మీ అలవాట్లు, కుటుంబ సభ్యులు, మిత్రులతో ఆనందంగా గడపడానికి, పరిశుభ్రత, సేవా కార్యక్రమాలకు కేటాయించడం ద్వారా మీరు ఒత్తిడికి గురికాకుండా జీవితాన్ని ఆనందంగా, ఆరోగ్యంగా గడిపేందుకు ఇదో అద్భుతమైన, ఆచరణాత్మకమైన విధానం.
ఈ ఉపయోగాలు తెలుసా?
- 8+8+8 రూల్ అందరికీ ఒకేలా నప్పకపోవచ్చు. ఎవరి అవసరాలను బట్టి వారు తమకున్న సమయాన్ని చిన్న చిన్నభాగాలుగా విభజించుకొని చక్కని ప్రణాళికను క్రశిక్షణతో ఆచరిస్తే ఉత్తమ ఫలితాలు సాధించొచ్చు.
- మీ జీవన శైలిని ఆరోగ్యంగా, సంతృప్తికరంగా మలచుకొనేందుకు ఇదో చక్కని సాధనంగా ఉపయోగపడుతుంది. మీ పనుల్ని భాగాలుగా విడగొట్టడం ద్వారా చేసే పనిపట్ల ఫోకస్ పెరుగుతుంది.
- ఈ రూల్ని దైనందిన జీవితంలో ఒక అలవాటుగా మార్చుకుంటే.. ముఖ్యమైన పనులేవీ నిర్లక్ష్యం కాకుండా ఉంటాయి. అలాగే, దీర్ఘకాలంలో మరిన్ని సత్ఫలితాలూ సాధించవచ్చు.
- కుటుంబం/మీ అభిరుచులకు కేటాయించే సమయాన్ని పెంచుకోవచ్చు. సంగీతం, పుస్తక పఠనం వంటి అలవాట్లతో మీ ఊహాశక్తి పెరగడంతో పాటు కొత్త ఆలోచనలతో నిత్యనూతనంగా జీవితాన్ని తీర్చిదిద్దుకోవచ్చు.
- మీ సమయాన్ని బ్రేక్ చేయడం ద్వారా ఎప్పటికప్పుడు విశ్రాంతి లభించడంతో ఫ్రెష్గా ఉంటారు. పనిలోనూ సృజనాత్మకతో కూడిన పరిష్కారాలు కనుగొనడం ద్వారా కెరీర్లో రాణించవచ్చు.
- రోజూ తగినంత నిద్రతో శారీరక, మానసిక ఆరోగ్యం మెరుగవుతుంది. ఒత్తిడి, ఆందోళన, నిరాశ వంటివి తగ్గి శరీరంలో సహజ ప్రక్రియలు మెరుగవుతాయని పలు అధ్యయనాలు పేర్కొంటున్నాయి.