Work - Life Balance | వర్క్‌-లైఫ్‌ బ్యాలెన్స్‌.. 8+8+8 రూల్‌ తెలుసా?
ఎవరికైనా ఒక రోజులో ఉండేది 24గంటలే. అందువల్ల కాలం విలువను గుర్తించి దాన్ని ఉపయోగించుకొనే సమర్థతలోనే ఉంది అసలైన విజయ రహస్యం.
By Education News Team
Published :04 Feb 2024 16:38 IST
https://results.eenadu.net/news.aspx?newsid=18062024
ఇంటర్నెట్ డెస్క్‌: ‘నిన్న గడిచిపోయింది. రేపు ఏమవుతుందో తెలీదు. అందుకే చేతిలో ఉన్న కొద్ది సమయాన్ని (Time Management) సద్వినియోగం చేసుకోవాలి’ అంటారు మదర్‌ థెరిసా. ఎవరికైనా ఒక రోజులో ఉండేది 24గంటలే. కాలం విలువను గుర్తించి దాన్ని ఉపయోగించుకొనే సమర్థతలోనే ఉంటుంది అసలైన విజయ రహస్యం. మనిషి జీవన శైలిలో రోజురోజుకీ వస్తోన్న మార్పులతో కళ్లుమూసి తెరిచేలోగా గడియారం గిర్రున తిరిగి రోజులు గంటల్లా కరిగిపోతుంటాయి. గడిచిపోయిన క్షణం తిరిగి రాదు గనక ఉన్న సమయాన్నే సరిగా ఉపయోగించుకోవాలంటే చక్కటి టైం మేనేజ్‌మెంట్‌ తప్పనిసరి. వర్క్‌ కల్చర్‌(work culture)లో మార్పులు, ఉరుకుల పరుగులతో కూడిన జీవన ప్రయాణంలో అటు వృత్తి, ఇటు వ్యక్తిగత జీవితాన్ని సమతుల్యం (Work-Life Balance) చేసుకొని ముందుకెళ్లడం కత్తిమీద సామే! అందువల్ల ఒత్తిడిని జయించి శారీరక, మానసిక ఆరోగ్యాన్ని కాపాడుకొనేందుకు 8+8+8 రూల్‌ పాటిస్తే మేలంటున్నారు నిపుణులు.
జాబ్‌ మార్కెట్‌ ట్రెండ్స్‌: 2030 నాటికి ఏ ఉద్యోగాలు పెరుగుతాయ్‌? ఏవి తగ్గుతాయ్‌?
ఇంతకీ ఏమిటీ 8+8+8 రూల్‌?
టైంను ఎంత సమర్థంగా ఉపయోగించుకోవచ్చో తెలిపే మంచి టైం మేనేజ్‌మెంట్‌ పద్ధతి ఇది. వృత్తి, వ్యక్తిగతమైన జీవితాలను సమతుల్యం చేసుకొనేందుకు ఒదొక ఆయుధం లాంటిదని చెప్పొచ్చు. దీని ప్రకారం.. ఒక రోజులో ఉండే 24 గంటల సమయాన్ని ఎనిమిది గంటల చొప్పున విభజించుకోవాలి. 8 గంటల్ని మీ ఉద్యోగం/వృత్తికి వినియోగిస్తే.. మరో 8గంటలను మీ అలవాట్లు, కుటుంబ సభ్యులు, మిత్రులతో ఆనందంగా గడపడానికి, పరిశుభ్రత, సేవా కార్యక్రమాలకు; మిగతా ఎనిమిది గంటల సమయాన్ని నాణ్యమైన నిద్ర కోసం కేటాయించుకోండి. శారీరక, మానసిక ఆరోగ్యంతో పాటు మీ లక్ష్యాలను సులువుగా చేరుకొనేందుకు ఇదో గొప్ప సాధనంగా ఉపయోగపడుతుందని నిపుణులు సూచిస్తున్నారు.
ఉపయోగాలేంటీ?
- 8+8+8 రూల్‌ అందరికీ ఒకేలా నప్పకపోవచ్చు. ఎవరి అవసరాలను బట్టి వారు తమకున్న సమయాన్ని చిన్న చిన్నభాగాలుగా విభజించుకొని చక్కని ప్రణాళికను క్రశిక్షణగా ఆచరిస్తే ఉత్తమ ఫలితాలు సాధించొచ్చు.
- మీ జీవన శైలిని ఆరోగ్యంగా, సంతృప్తికరంగా మలచుకొనేందుకు ఇదో చక్కని సాధనంగా ఉపయోగపడుతుంది. మీ పనుల్ని భాగాలుగా విడగొట్టడం ద్వారా చేసే పనిపట్ల ఫోకస్ పెరుగుతుంది.
- ఈ రూల్‌ని దైనందిన జీవితంలో ఒక అలవాటుగా మార్చుకుంటే.. ముఖ్యమైన పనులేవీ నిర్లక్ష్యం కాకుండా ఉంటాయి. అలాగే, దీర్ఘకాలంలో మరిన్ని సత్ఫలితాలూ సాధించవచ్చు.
- కుటుంబం/మీ అభిరుచులకు కేటాయించే సమయాన్ని పెంచుకోవచ్చు. సంగీతం, పుస్తక పఠనం వంటి అలవాట్లతో మీ ఊహాశక్తి పెరగడంతో పాటు కొత్త ఆలోచనలతో నిత్యనూతనంగా జీవితాన్ని తీర్చిదిద్దుకోవచ్చు.
- మీ సమయాన్ని బ్రేక్‌ చేయడం ద్వారా ఎప్పటికప్పుడు విశ్రాంతి లభించడంతో ఫ్రెష్‌గా ఉంటారు. పనిలోనూ సృజనాత్మకతో కూడిన పరిష్కారాలు కనుగొనడం ద్వారా కెరీర్‌లో రాణించవచ్చు.
- రోజూ తగినంత నిద్రతో శారీరక, మానసిక ఆరోగ్యం మెరుగవుతుంది. ఒత్తిడి, ఆందోళన, నిరాశ వంటివి తగ్గి శరీరంలో సహజ ప్రక్రియలు మెరుగవుతాయని పలు అధ్యయనాలు పేర్కొంటున్నాయి.