Exams Preparation | ‘ఆలస్యం అమృతం విషం’.. పరీక్షల ప్రిపరేషన్లో ఈ పొరపాట్లు చేయొద్దు!
రాబోయేదంతా పరీక్షల సీజనే. సీబీఎస్ఈ(CBSE), ఎస్ఎస్సీ, ఇంటర్ బోర్డులు ఇప్పటికే వార్షిక పరీక్షల షెడ్యూళ్ల(Exams Schedule)ను ప్రకటించేశాయి. వీటికి తోడు మున్ముందు జేఈఈ మెయిన్, నీట్ వంటి పోటీ పరీక్షలు ఉండటంతో విద్యార్థులకు ఇది పరీక్షా కాలమే.
By Education News Team
Published :17 Dec 2025 16:52 IST
https://results.eenadu.net/news.aspx?newsid=17122025-exams-prep
Exams Preparation| ఇంటర్నెట్ డెస్క్: రాబోయేదంతా పరీక్షల సీజనే. సీబీఎస్ఈ(CBSE), ఎస్ఎస్సీ, ఇంటర్ బోర్డులు ఇప్పటికే వార్షిక పరీక్షల షెడ్యూళ్ల(Exams Schedule)ను ప్రకటించేశాయి. వీటికి తోడు మున్ముందు జేఈఈ మెయిన్ (JEE Main 2026), నీట్ (NEET 2026) వంటి పోటీ పరీక్షలు ఉండటంతో విద్యార్థులకు ఇది పరీక్షా కాలమే. అందువల్ల ఇప్పట్నుంచే సరైన ప్రణాళిక(Plan), సన్నద్ధత(Preparation)తో ముందుకెళ్తే తప్ప మంచి మార్కులతో రాణించడం కష్టమని నిపుణులు అంటున్నారు. ప్రిపరేషన్ (Preparation) సమయంలో చేసే చిన్నచిన్న పొరపాట్లను సరిదిద్దుకుంటే మంచి ర్యాంకులు సాధించొచ్చని సూచిస్తున్నారు. ప్రిపరేషన్ సమయంలో చేయకూడని పొరపాట్లేంటో చూద్దాం!
వాయిదాలు వేయడం..
‘ఆలస్యం అమృతం విషం’ అంటుంటారు మన పెద్దలు. వాయిదా వేసే ధోరణి అప్పటికి కాస్త సౌకర్యమంతంగా అనిపించినా.. ఆ తర్వాత ప్రమాదం ముంచుకురావడం ఖాయం. అందువల్ల, ఏదైనా లక్ష్యాన్ని పెట్టుకున్నప్పుడు వాయిదాలు వేయకుండా.. వెంటనే కార్యాచరణ ప్రారంభించాలి. కానీ, రేపట్నుంచి మొదలు పెడదాంలే.. ఏమవుతుంది? అనే నిర్లక్ష్య ధోరణితో చాలా మంది వాయిదా పద్దతులు అనుసరిస్తుంటారు. ఇది ఎక్కువమంది సర్వసాధారణంగా చేసే పొరపాటు. అందువల్ల, ఇప్పటినుంచే మీరు తగిన టైం టేబుల్ సిద్ధం చేసుకొండి. వాస్తవిక లక్ష్యాలకు అనుగుణంగా ప్రిపేర్ అవ్వండి. మీ స్టడీ ప్లాన్కు అనుగుణంగా ఉండేలా తగిన జాగ్రత్తలు తీసుకొని ముందుకెళ్లండి.
స్టడీ మెటీరియల్స్పై ఆధారపడటం
అనేక మంది విద్యార్థులు పరీక్షలకు కొద్ది రోజుల ముందే ప్రిపరేషన్ మొదలు పెడుతుంటారు. అందుకోసం పూర్తిగా స్టడీ మెటీరియల్స్పైనే ఆధారపడి చదువుతుంటారు. ఇది చాలా పొరపాటు. మనం చదివే పుస్తకం ఏదైనా సరే.. మనలో ఒక ప్రత్యేకమైన దృక్పథాన్ని ఏర్పరచడమే కాకుండా జ్ఞానాన్నీ పెంచుతుంది. ఆయా విషయాలపై సమగ్ర అవగాహన కల్పిస్తాయి. పాఠ్యపుస్తకాలను చదవడంతో పాటు ఆన్లైన్లో అందుబాటులో ఉన్న ఇతర వనరులను అన్వేషించి అధ్యయనం చేయడం ద్వారా మీలో ఆత్మవిశ్వాసం పెరుగుతుంది.
కొన్ని చాప్టర్లపై నిర్లక్ష్యం!
కొందరు విద్యార్థులు తమ ప్రిపరేషన్లో కొన్ని సబ్జెక్టులు/చాప్టర్లను వదిలేసి కొన్నింటినే చదువుతుంటారు. అలాంటి నిర్లక్ష్య ధోరణితో చేటు తప్పదు. ప్రతి సబ్జెక్టూ పరీక్షలో అత్యంత కీలకమే. ఒక్క అంశాన్ని నిర్లక్ష్యం చేసినా అది మీ పూర్తి స్కోరుపై ప్రభావం చూపుతుందని మాత్రం మరిచిపోవద్దు.
సరిగా రివిజన్, ప్రాక్టీస్ చేయకపోవడం
ప్రిపరేషన్లో రివిజన్, ప్రాక్టీస్ అనేవి ఎంతో కీలకమైన ప్రక్రియలు. గతంలో చదివిన పాఠ్యాంశాలను తిరిగి మననం చేసుకోవడం ద్వారా అవి గుర్తుండిపోతాయి. ఆ సబ్జెక్టులపై మనకు తిరుగులేని ఆధిపత్యం ఏర్పడుతుంది. అందువల్ల, చదివిన సబ్జెక్టుల్ని పునశ్చరణ చేసుకోవడం, ప్రాక్టీసు చేయడం మరిచిపోవద్దు.
బట్టీ పట్టి చదవడం..
ఏ అంశాన్నైనా సరిగా అవగాహన చేసుకోకుండా కంఠస్థం చేయడం సాధారణంగా చేసే తప్పిదం. సమాచారాన్ని బట్టీ పట్టడం స్వల్పకాలంలో మీకు సహాయపడొచ్చు.. కానీ, ఏ విషయంపైనా లోతైన అవగాహనకు ఇది ఏమాత్రం ఉపయోగపడదు. అంతర్లీన భావనలను అర్థం చేసుకోవడంపై దృష్టిసారిస్తే మెరుగైన ఫలితాలు సాధిస్తారు.
ఆరోగ్యాన్ని నిర్లక్ష్యం చేయడం..
ప్రిపరేషన్ సమయంలో కొందరు ఆరోగ్యాన్ని నిర్లక్ష్యం చేస్తుంటారు. శారీరక, మానసిక దృఢత్వమే పరీక్షలో మీ పెర్ఫామెన్స్పై ప్రభావం చూపిస్తుంది. నిద్రలేమి, సరైన ఆహారం తీసుకోకపోవడం, తగిన వ్యాయామం చేయకపోవడం వంటివి మీ ఏకాగ్రత, జ్ఞాపకశక్తిపై ప్రతికూల ప్రభావాన్ని చూపుతాయి.