IIT Madras | ఐఐటీ మద్రాస్‌ గురించి తెలుసా? కోర్సులేంటీ.. ప్లేస్‌మెంట్స్‌ ఎలా ఉంటాయ్‌?
ఐఐటీ మద్రాస్‌..(IIT Madras) దేశంలోనే అత్యుత్తమ విద్యాసంస్థగా ప్రఖ్యాతిగాంచింది. ఈ విద్యా సంస్థలో చేరాలన్నది లక్షలాది మంది విద్యార్థులకు ఓ డ్రీమ్‌. ఈ నేపథ్యంలో IIT Madras క్యాంపస్‌ ఎలా ఉంటుంది? ఏయే కోర్సులు ఉన్నాయి? ప్లేస్‌మెంట్స్‌కు ఉన్న అవకాశాలేంటి? అనే ప్రశ్నలకు సమాధానాలివిగో!
By Education News Team
Updated :08 Apr 2025 14:32 IST
https://results.eenadu.net/news.aspx?newsid=15082024
ఇంటర్నెట్‌ డెస్క్‌: ఐఐటీ మద్రాస్‌..(IIT Madras) దేశంలోనే అత్యుత్తమ విద్యాసంస్థగా ప్రఖ్యాతిగాంచింది. ఈ విద్యా సంస్థలో చేరాలన్నది లక్షలాది మంది విద్యార్థులకు ఓ డ్రీమ్‌. ఐఐటీల్లో బీటెక్‌/బీఈ ప్రవేశాల కోసం మే 9న జేఈఈ అడ్వాన్స్‌డ్‌ పరీక్ష(JEE Advanced 2025) జరగనున్న వేళ ఐఐటీల గురించి విద్యార్థుల్లో పలు సందేహాలు ఉండటం సహజమే. ఆన్‌లైన్‌లో లభించే రకరకాలైన సమాచారంతో అయోమయానికి గురికాకుండా ఐఐటీ-మద్రాస్‌ పూర్వవిద్యార్థులు ఓ కొత్త ఆలోచనకు రూపునిచ్చారు. www.askiitm.com పేరుతో ఒక వెబ్‌సైట్‌ను ప్రారంభించారు. ఈ లింక్‌పై క్లిక్‌ చేయడం ద్వారా IIT Madras గురించి మీలో ఉన్న ఎన్నో ప్రశ్నలకు వీడియో రూపంలో తెలుగులోనే సమాధానాలను అందుబాటులో ఉంచారు.
Askiitm వెబ్‌సైట్‌లో తెలుగులో ఇచ్చిన 11 వీడియోల్లో ఐఐటీ మద్రాస్‌ అంటే ఏమిటి? దాని చరిత్ర, ప్రత్యేకతలేంటీ? క్యాంపస్‌ ఎలా ఉంటుంది? ఏయే కోర్సులు ఉన్నాయి? బ్రాంచ్‌ ఎలా ఎంచుకోవచ్చు? ప్లేస్‌మెంట్స్‌, రీసెర్చ్‌, ఎంటర్‌ప్రెన్యూర్‌షిప్‌ అవకాశాలు ఎలా ఉన్నాయి? సాంస్కృతిక కార్యక్రమాలు, ఎలాంటి క్రీడా అవకాశాలు ఉన్నాయి? తదితర అనేక విషయాలను ఈ వీడియోల్లో పొందుపరిచారు. అంతేకాదు.. ఈ వెబ్‌సైట్‌లో ఎవరైనా సరే, ఈ సంస్థకు సంబంధించిన ఏ విషయం గురించైనా ప్రశ్నలు అడగొచ్చు. వాటికి కొన్ని గంటల్లో జవాబులు ఇస్తారు. క్యాంపస్‌, ప్లేస్‌మెంట్స్‌, ఫ్యాకల్టీ, అకడమిక్స్‌... ఇలా దేని గురించైనా అభ్యర్థులు తమ సందేహాలు అడిగి నివృత్తి చేసుకోవచ్చు. అభ్యర్థులకు కచ్చితమైన సమాచారం అందించాలన్న ఆశయంతో దీన్ని ఏర్పాటు చేశారు. అంతేకాదు.. జేఈఈ పరీక్షకు సన్నద్ధమయ్యే వారి కోసం సైతం అప్పుడప్పుడూ వర్చువల్‌ టూర్‌లు నిర్వహిస్తుంటారు. ఆసక్తికలిగిన వారు వాటిని ఉపయోగించుకొని తమ బంగారు భవితకు బాటలు వేసుకోవచ్చు.